NaturArte é unha proposta de narración oral que parte dunha idea ampla e integradora do concepto de arte, entendida como unha forma de expresión humana que nace da observación, da relación e do diálogo coa natureza.

A natureza foi historicamente:

• tema (paisaxes, animais, elementos naturais),
• materia (pedra, madeira, pigmentos, terra),
• e inspiración simbólica para a creación artística.

Desde esta perspectiva, a narración oral convértese nunha ponte entre as artes visuais (ilustración, pintura, escultura) e a palabra, permitindo achegar ao alumnado unha experiencia artística viva, accesible e significativa.

A proposta constrúese como creación oral propia, inspirada en diferentes linguaxes artísticas, sen reprodución literal de obras, mais con historias que dialogan e complementan os seus universos estéticos.

Dúas versións da proposta

Educación Infantil, 1º e 2º de Primaria

Neste tramo, a natureza preséntase como un espazo próximo, sensible e cheo de vida. As historias xorden de formas, cores, volumes e movementos presentes tanto na natureza como na arte.

A utilización de álbums infantís de autoras e autores galegos e internacionais dialoga coa obra de pintores e pintoras, tamén galegas e internacionais.

Ciclos vitais, cor, transformación, forza simbólica da paisaxe, natureza real e imaxinaria constitúen o eixo das narracións.

A mestura de diferentes artes permite ao alumnado gozar do descubrimento da natureza como fonte de historias e creación artística, así como:

• relacionar formas naturais e formas artísticas,
• desenvolver a percepción sensorial e a imaxinación,
• favorecer a expresión oral, artística e corporal.